إنت عارف أنا ابن مين
بقلم الشاعر: د. صلاح شوقي
عارفك ، انت اللي كنت بتعيط حافي ، ورا
أمك بياعة الفِجل ، على كوبري منيا القمح
عارفك ، كنت تعيط يوم ، عشان العسلية ، و
عشاكم يكمَل نوم ، خاينين تنسوا العيش والملح
عربية إيه ؟ لولا فلوس الجيش ، ما كنت لقيت العيش ، يا واكل الفتَّة مع الجرو ، على السَّطح
عارفك شعارك ( البلد اللي ما تعرفَك شَلَّح فيها
واجري ) ، من الحفاة العراة ، تحب المدح
وانتَ عارفك ، أبوك حرامي فوس في القيَّالة
وانت بلمعَة ، تبيَّن ٢٠٠ جنيه في السِّيالة ،صح؟
عارفك ، عامل مش سامِع ، شفت أمك
جنب الجامع ؟ ، فشَّار ، تنزَح البِير بمعلقة نزح
وانتَ عارفك ، تبَدَّل العبايات والمعاطف ، و
المرحوم كان حرامي شباشِب ومقاطف ، صح؟
عارفك ، نسيت سرقة البط والفراخ من العِشة ، و النبى كفاية نَفشَة ، يابخيل يابن الشُح !!
عارفك ، فنجري بُق ، طالع لأبوك كلامَنجي وأمك حسَّادة و أذَى ، واخدة البطولة في الرَّدح
عارفك ، أبوك زِير نساء معيُوب ، وأمك بالأجرة
ندَّابة تلطم تشق الجيوب ، شغلها من الصبح
عارفك ، في بِيتك رجول فراخ على النار ، و
عشان العضم ، بتتباهى عند الجزار ، كفايه كَح
عارفك ، ناسي أولَك نطفة ، وأخرتك جِيفة ، يا
مغرور يا بن النضِيفة !! ، وعنيك تسِح سَح
وانتَ عارفك ، فاضِي السِّيَّالة ، وشِدقك ينزل
رِيالة ، والآن الحاج راح ، أبو الباشا جه ، صح؟
انت عارفك ، ابن الأكرمين ايه ياجربوع ، يا
شَبعَة بعد جوع ، للآن بتمسَح الأطباق مَسح
كلنا ولاد تسعة أمَام الحق ، ناسي يوم الوعيد
، مفيش مناصب ، ولا أسياد وعبيد ، صح؟
اللهم لا اعتراض على العاطِي ، حكمته يوَطِّي بن الأصل ويعلِّى الواطي ، كفاك في الغرور رَمح
الهدف التواضع ، لو ودانَك فيها طين ، كلامي مش نافع ، كأني أأدن في مالطة ، كفاية بَح؟
عرفت انت مين ابن مين ؟
المؤلف د. صلاح شوقي. مصر
★كلامي بشكل عام لا اقصد شخص بعينه
ليست هناك تعليقات:
إرسال تعليق