صحبةالسوء
بقلم الشاعر المبدع: فوزي سليم . مصر
ماشي ورايح لغابة.
ماليانة أسود وديابة.
مع ناس خاينة و كدابة.
والسكة طويله وضلمة.
والشوك فيها مزروع.
/////
بابكي من غير دموع.
واضحك وانا موجوع.
واصرخ صوتي مش مسموع.
وماشي في الضباب...
لطريق مافيهوش رجوع.
/////
وعملت ذنوب كتير.
وحياتي مافيهاش تغيير.
والعقل خلاص هايطير.
قررت أسيب الصحبة
ونويت على التغيير.
////
لقيتني باقول يارب.
ياكاشف كل كرب.
وياغافر كل ذنمب.
انت العالم بحالي.
ودعائي ليك مرفوع.////
لقيت الفجر طالع.
دخلت جوا الجامع.
وناديت ربي اللي سامع .
والشمس نورها ساطع.
لقيت دعائي مسموع.
/////
الكرب زال خلاص.
والوجع راح م الراس.
ورجعت لأحسن ناس.
وجمعني بيهم ربي.
أحبه وولاد اصول.
/////
ونويت خلاص أتوب.
وما اعملش الذنوب.
وابعد عن أي عيوب.
واصاحب ناس حلوة.
ويكونوا ولاد حلال.
بقلم.فوزي-سليم.مصر
ليست هناك تعليقات:
إرسال تعليق