مهرجان شعبي
بقلم الشاعر: خالد كرومل ثابت
على فين على فين
ودّانا يا دنيا على فين
أنا قلبي طيب ومجروح
وإنتِ عليّا قاسية ليه
على فين على فين
والوجع سابق سنين
سيبيني أفرح ليلة
ده أنا تعبت من الحنين
مش كل ضحكة تبقى فرحة
ولا كل سكوت رضا
في ناس تضحك قدّامك
وجواها ألف أذى
ماشي وسايبها على الله
قلبي نضيف مش غدّار
اللي باعنا في أول مطب
من حسابنا برّه الدار
على فين على فين
داسه علينا الزمن
أنا عمري ما أذيت حد
ليه دايمًا أنا الحزين
أنا قلبي لما يحب
ما يعرفش غير الأمان
أديت عمري على قدّي
ومستني كمان
بحب اللي يطمني
وقت الخوف والليل
مش اللي يسيب في الضيقة
ويقولّي معلش استحمل شيل
آه يا دنيا
أنا مش ضعيف
أنا موجوع
على فين على فين
الصبر طول سنين
سيبيني أفرح ليلة
ده أنا تعبت من الحنين
وبغنّي والليل شاهد
والقمر سامع كلامي
لو بكرة ضحك في وشي
يبقى الفرج قدّامي
مش طالب غير سترها
ولا جاه ولا مال
اللي عاش بنيّة صافية
ربّنا دايمًا معاه
على فين على فين
لو السكة حبّ وأمان
أنا ما أسيبش طريقي
حتى لو ضدّ الزمان
على فين
إحنا رايحين على فين
ليست هناك تعليقات:
إرسال تعليق