عنقود عنب
بقلم الشاعر : وائل البطراوي
عنقود عنب أنقطف بدرى
حباته لولى والغصن وردى
والعمر أصله بسرعة يجرى
اول ما يجى عليه الدور
كل حباية وراها قِصة
احلام بريئة وخضرة لسة
وقلوب رقيقة ناعمة و حاسة
ومتحملة فى عمر الزهور
من صغرهم عاشوا الشقا
و امال فى دنيا متعلقة
ورغم التعب كان الُلقا
بيفتح لهم طاقة نور
احلامهم بسيطة عادية
تبدأ يوماتى م الفجرية
سابقين الضى بشوية
ويتجمعوا كل الحور
عنقود عنب مصرى بناتى
طرحه بيشبه لخير بلادى
وام بتصرخ فينهم بناتى
اكتر وجع وأصعب شعور
عنقود عنب طعمه مر
على كل واحد قاصد يضر
وتحية للى يعيشها حر
ويبعد عن أى زور
بقلم. وائل البطراوى
تحية لكل من حافظ على الرزق الحلال
ليست هناك تعليقات:
إرسال تعليق